Fikambanan’ny Mpamaky Teny Antso Mahatoky Fenoarivo

Fankalazana ny faha-herintaona nijoroany

Ny Fikambanan’ny Mpamaky Teny Antso Mahatoky Fenoarivo (MTAMF), izay miasa eo anivon’ny Fiangonana, dia mankalaza am-pifaliana ny tsingerintaona voalohany nijoroany.

 Ity fikambanana ity dia iray amin’ireo sampana tanora indrindra ao amin’ny fiangonana, natsangana tamin’ny 23 martsa 2025, ary efa nahavita asa lehibe teo amin’ny fanompoana ny Tenin’Andriamanitra.

Fikambanana mitondra ny Tenin’Andriamanitra.

Ny MTAMF dia manana tanjona mazava sy manan-danja, dia ny:

  • Mampita ny Soratra Masina amin’ny fomba marina, mazava ary miaina ka mampita izany amin’ny alalan’ny vakiteny perikopa isaky ny Alahady.
  • Mampiofana sy manatsara ny fahaizan’ny mpikambana ho mpamaky teny mahay
  • Mandray anjara mavitrika amin’ny fanompoam-pivavahana sy ny asa ataon’ny fiangonana

Fankalazana ny tsingerintaona voalohany

Ny fankalazana ny faha-herintaona dia fotoana iray lehibe ho an’ny fikambanana, satria:

  • Fotoana nisaorana an’Andriamanitra noho ny fitahiany sy ny fitarihana nandritra ny taona iray
  • Fotoana fijerena ny lalana nodiavina sy ny fanomanana fandraisana ireo mpikambana vaovao.
  • Fotoana fanamafisana ny firaisankina eo amin’ny mpikambana
  • Ary indrindra, fotoana fanavaozana ny fanoloran-tena amin’ny fanompoana

Nandriatry ny fotoana dia nisy ny :

  • Fanompoampivavahana manokana, narahina fifampiharabana nahatratrarana ny taona vaovao, ny lalao samihafa. Teo ihany koa ny fizarana traikefa sy fijoroana vavolombelon, ny fiaraha-mientana sy fifampiarahabana.

Rehefa miditra amin’ny taona faharoa ny MTAMF dia mikendry hatrany ny vina dia ny hahatonga ny mpikambana tsirairay ho matihanina amin’ny famakian-teny, ny fahaizana mampita ny fahalalana amin’ny hafa (mpikambana vaovao).

Famaranana

Ny Fikambanan’ny Mpamaky Teny Antso Mahatoky Fenoarivo dia porofo fa na dia vao manomboka aza, dia afaka mitondra fiovana lehibe eo amin’ny fiainam-panahy sy ny fiangonana iray manontolo.